إلا ياوردة الجوري ذبلتي والعطر مافاح
ربيعك والشتا واحد تساوت كنها سنيني
إلا ياللــــه تفرجها..وعندك أمري يافتاح
إبنسى مامضى ونارٍ بصدري حيل تكويني
ليالي عشتهـا ويــاه أجســادً بـلا أرواح
عشنـا كننا أخوان ..مسافــه بينه وبيني
صبرت وأثري بصبري قتلت بدنيتي أفراح
وأول فرحـه لأمي فداها مابقى فينـي
وثاني فرحه فرحتنا ماتت وكل شئ راح
وثالث فرحه لأهلي ولـ هله وناس تغليني
إللي يربطــه فيني توقيعـي لعقــد نكاح
ياليت أن الزمن يرجع ولا وقعته بايديني
فـ بحر الهم غرقانه وأقداري بمهب رياح
تصبحنـي على دمعي وعلى دمعي تمسينـي
نســى حـب فـي قلبـه بناه بعشرتي صـراح
نســى عهده ووعده قـدر يبعــد..يخلينـي
(كفايــة هـم يادنيــا) كفايه أرتوي بجراح
تجرعت الحزن لحظه بلحظه وأنت ساقيني
كثير أحزان هالدنيا وحزني بالخفوق إجتاح
تمكن من دروب الحِب ينهيها وينهيني
إلا يازمــن ظالـــم يكفيني بكـــا وصيـــاح
يكفيني هموم يالله عسى بالفرح تغنينـــي
صبرت وليتني ألقى لضيقي بالصبر مفتاح
وأنا صبري نفذ مني ولابه من ينسيني
خسارة بالهوى..والله لعوضها علي أرباح
ولطوي ماضي لطاريه وكل ذكرى تعنيني
متى بتطيب ياجرحي أعيش بدنيتي مرتاح
متى بلقى حبيبٍ يوفي العشره ويوفيني
متى ياشمعتي تضوي لدربي بالهوى مصباح
متى ياوردة الجوري بعطر الشوق تدفيني
اختكم/ نور الحلاني
